কৗলকৗ উঠৗও

কৗলকৗ উঠৗও:- 

কৗলকৗ উঠৗও

সেঁদরা কারকা করে, মিদটাং সেঁদরা কাতে গজ্‌ আকাদে জিয়ালি চেতান রে বার হড় সে অৗড়ি গান হড় আকওয়াঃ হক্ ক জৗরি লে তাক খান, উনকু মুদরে সৗরি উতৗর অকয় শিকৗরি উনি জিয়ৗলিয় গজ্‌ আকাদেয়া, অনা বাছনাও উডুক্ লৗগিৎ তে ধরম ঞুতুমতে মিদ্ লেকানাঃ কিরৗ ক আতাং হচ কওয়া। আর অনা কিরৗ দ নঃ-অয় নংকা – উনি গজ্‌ আকানে জিয়ৗলিয়াঃ “ইনবর” কটঃ কাতে লৗই হুয়ঃ আ যে ইঞাঃ তি তেগে নুই জিয়ৗলি দয় গজ্‌ আকানা সে ইঞ গেঞ গজ্‌ আকাদেয়া মেন্তে। “ইনবর” দ কটঃ কাতে আদ উদ্ উতৗর হুয়ুঃ আ।

 কৗমি তেৎ দ নঃ অয় নংকা—

সুতৗন্ টান্ডি রে দিশওয়ৗ ক তালারে গালমারাও তালাতে বাং সালা গটা লেনখান উনদ আদ কৗলকৗ উঠৗও রেনাঃ ক গটায়া। দিহরি-দ মিদ্ ঠেন গুরিচ্ ফারচা কাতে ধরম ঞুতুম তে পে টিউৗ সিঁদুর এ আঁড়গোয়া (সামাং সেদ্ রে আঃ সার, কৗপি আর খৗডয়ৗঃ ক দহয়া)। দিহরি দ তিনৗঃ হড় আকওয়াঃ হক ক জৗরিয়েৎ তাকওয়া, উনঠেন সারজম সাকাম চেতান রে উনি জিয়ৗলিয়াঃ হড়ম খন গেৎ উডুক ‘ইনবর’ হাঁটিঞ কাতেৎ এ্য দহয়া। আদ অনাক দহ কাতে সানাম কতে অঁড়ে ধরম ঞুতুম তে উনরেক বাঁখেড়া ।

“মা এনখান ধরম গঁসাই তেহেঞ দ আলে ক,

নওয়া বাংলে সালা গটা দাড়েয়াৎ খৗতির, 

আম ঞুতুম কাতে ধরম কৗলকৗ 

অনে লে উঠৗও এৎ কানা গঁসাই—

তেহেঞ দ আমগে নওয়া সুতৗন্‌ টান্ডিরে 

সৗথী দহ কাতে সৗরি আর এডে লে

পাঁজায়েৎ কান বাছনাও এৎ কান গঁসাই –

 মা এনখান সৗরি দ জায়যুগ গে সৗরি কঃ মা বাড়ে গঁসাই। 

তেহেঞ নুকু ক মুদরে জাঁহায় এড়ে কাথা লৗই কাতে সৗরিয় লেবেদ লটম এৎ কানা, 

উনি দ একাল গে বাড়ে আলম ইকৗয়েয়া গঁসাই।

 মা গঁসাই এনখান সৗরিদ জিয়ৗও দহ কাতে

 এড়ে কাথা লৗই ইচ্ দ সাসেৎ এমায় মে বাড়ে।

আদ উনকু জাঁহায়-ক হক্ ক জৗরিয়েৎ দ ঝতমগে তোপো ফারচা হচ কাতে পুব সেৎ সামাং কাতে অনে দহ রে মেনাঃ আন সাকাম চেতান রেনাঃ “ইনবর” আদ ক কটঃ হচ কওয়া। সৗরি উতৗর ধরম কৗলকৗ রেনাঃ নংকা দাড়ে মেনাঃ আকাৎ আ, জাঁহায় বাড়ায় তুলুচ এড়ে কাথা তে উনি জিয়ৗলি চেতানরে আজাঃ হক্ এ্য জৗরিয়েৎ তাঁহেৎ, উনি দ অনা ‘ইনবর' কটঃ কাতে উদ্ সাঁও সাঁও তেগে হড়ম দ গ-স অঁড়গো গদঃ তায়া। উদ্ আকাৎ-এ্য সাঁও সাঁওতেগে হড়ম ই বৗড়িচ্ দাড়েয়াঃ তায়া।

ধরম কৗলকৗ রেনাঃ দাড়েদ নংকানা, এড়ে কাথা লৗই তুলুচ অনা ইনবরয় কটঃ এৎ হড়দ অনা খৗতির আজাঃ বাং রেহঁ আজাঃ অড়াঃ রেনাঃ অৗড়ি বৗড়িচ্ জাঁহানাঃ ঘটাও দাড়েয়াঃ তায়া। মিদ কাথা তে আজাঃ অনা এড়ে কাথা রেনাঃ সাসেৎ দ ইনৗ হিলঃ বাং রেহঁ বিলম্‌ কাতে রেহঁয় ঞাম গেয়া। ইনৗ হিলঃ লেকাতে বাংগটা লেনখান উনি সৗল সে জিয়ৗলি দ দিশম হড়াঃ হেপাজত রেগেয় তাঁহেনা। কৗলকৗ উঠৗও তালাতে সৗরি এড়ে বাছনাও ওডোক এন রেদ নাপায় গে, বাং রেদ উনি সৗল দ দিশম হড় জাঁহা গেক গটায়া অনাগে হুয়ঃ আ। সৗরি উতৗর হকদার বাংক পাঁজা ঞাম লেনখান উনি দ দিশম হড় অকা ক গটায়া, অনা গে হুয়ুঃ আ। উইহৗর তাঁহেন মা ধরম কৗলকৗ রেনাঃ নংকা দাড়ে মেনাঃ আকাৎ আ, এড়ে কাথায় জৗরিয়াকাৎ হড় দ সাসেৎ এ ঞাম গেয়া।

©jaher boga santar ko puthi khon ........